بالـدّْم بْكيت زْمـاني

بالـدّْم بْكيت زْمـاني

بالـدّْم بْكيت زْمـاني

بالـدّْم بْكيت زْمـاني

النّاس فْكُل مْكان تْـقاسي وتْـعاني

بْـالجوع والقهر وحِرْماني

حْتّى مْنْ كْلْمْة حْقّ عَلاني

هداك قال السّلْمْ غير كْلْمَة فْـ لْساني

قْتّْل وْلادي فْـ حْضاني

والثاني بْالْارهاب سْماني

شْمّْر واهْجْم هْدّم بْنْياني

سْكّنّي لْخيام هْجّرني أَرْضي ومْكاني

بالدم بكيت زماني

فلسطين ولبنان

مصر والسودان

كُـلّها تْشكي وْتْعاني

العراق ، تونس ، سوريا واليمن

ويعلم الله شكون يتبعها تاني

قالونّا رْبيع عربي يْطفي لْجْمار

لونها قاني

ما شْفنا فيه غير الدمار

والموت وبنادم أناني 

النّْفوس رْخاصت

أطفال تغصبات وجاعت

لوطان تْباعت

الضماير ماتت 

خْرص لْساني بين سْناني

حْترنا فْ طْريق الصّدق

ما عْرفْنا شْكون لي كَيْتْشدّق

وشْكون لّي معاه الحق

الظالم تْسمّى مْظْلوم

وْمُولْ الدَّار صْبح مْحْروم

قْلْبو شَاخ يْبْكي مْكْلوم 

حالي وحالك فْـناني 

قلنا مْنْحَة تْخْرج من رَحمْ لْمْحاني

ولابد نْدفعو ثمن ف سبيل كرامة لانساني 

طَالْتْ لْحْبالا ولْفْرح نْسَـانا 

إيـلا سْمحنا حنا، 

كٍيف تْسمح دْمْوع لْعين يالِّـي بْـكّانـا ..؟

حْصٍيلْتْنا مْنْ لْهْموم تْقيـلة

وْحْلامْنا بْقات هْزيـلة

نْفوسْنَا غْرْقَاتْ فْ الضٍّـيم وْلاّتْ ذْلٍـيلَة

كٍيفْ ننسى سنين لْحْزان

فْ يُوم وْلـيلة

وْقْلوبْنا بْمناظير لجثث وْلاَّتْ عْليلة

بْكِيني يا لـيّام

وبْكي حْقوق لْإنْسان

وبْكي زْمان الذّْلّْ 

اللّْيالي فيهْ طْويلة
****
لله غيث نفسك يا بنادم
ورحمها راه عاقبة الظلم خسران
وجحيم النيران
لا يغرك كرسي ولا سلطان
لا تغرك دنيا كل من عليها فان
مسير ليام توريك بالبيان
يوم تسقط من عين الرحمان
وتتهان أمام العيان
ويمر قدامك شريط الطغيان
وكل مقهور ينادي ياربي هادا ظلمني 
هادا سلبني حقي وجفاني 
بالدم بكيت زماني 
في قلبي كلام كثير رهقني عياني
شحال ظلمتي يا إنسان ونعستي بقلبك هاني
كنشفق عليك من الشر لي فيك
ليوم عليّ وغْدّا عليك
حالي وحالك بكاني
ماراعيتي دم ولا إنسانية 

ماراعيتي عشرة 
ولا فكرتي فآخرة
إيوا غير دير وبقي راه الدنيا دوارة
شحال قالوا عليها ناس زمان
وشحال نظموا معاني
يا لّي ظلمتيني بأي وجه تلقاني
ويا ما غادي تْشوف مْحاني
ديك السّاعة تْفْكّرني ما تْنْساني
الله ما خْفاتو خافية
السّر عندو علانية
كولشي مسطّر مكتوب 
وخطوك كامل محسوب 
وفيوم الميعاد يتحط لميزان
وتشهد لجوارح واللسان
وتتهان أمام العيان
ديك الساعة تفكرني ما تنساني
لله رجع لنفسك يا إنسان
راك عليها جاني
وتذكّر ساعتك فالقبر وحداني
موسد فْعايل كيف فعال الشيطاني

مليكة